Kultura Arratian

        



Arratiako harana, urteak aurrera joan ahala, nabarmen aberastu egin da eremu guztietan.

Hori dela eta, museoetan edo erakustaretoetan, adibidez, Haranaren berezko ezaugarriei eta nortasunari eutsi egin zaie.

Museoak eta erakusgelak


       

Dimako Zamakolako Errota

Urkiolako Parke Naturaleko sarbide nagusietako batean dago, Baltzolako haitzuloetatik oso hurbil. Zamakolako errotan errotarien lanbide zaharra ezagutzeko aukera izango du bisitariak.

Aldez aurretiko ordua eskatzea gomendatzen da. Sarrera ordaindu behar da.


        
         


Arteako Euskal Baserriaren Museoa

Euskal Baserria harriz eta egurrez eraikitako XVII. mendeko baserri baten kopia zehatza da, eta hainbat zerbitzu zein eskaintza kultural eta etnografiko ematen ditu. Eraikinaren 500 metrotako azalera bi solairutan banatuta dago. Beheko solairuan 200 lagun ingururentzako jatetxe-kafetegia dago, eta bertako dekorazioa garaiko elementuek osatzen dute.

Goiko solairuan museo etnografikoa dago. Gure arbasoen historian zehar ibili ahal izateko, gune honetan 1.000 pieza baino gehiago bildu dira, den-denak benetakoak eta aurretiaz sailkatutakoak. Horrez gain, beste bi eraikin gehiago ditu: bat garagardotegia da, eta bestean azoka txiki iraunkorra eta jardueren gunea daude.

Amaitzeko, Euskal Baserriaren Museoak parke tematiko bat dauka euskal gizon eta emakumeen historia azaltzeko, glaziazio handien garaietik hasi eta XIX. mendera heldu arte. Horrela, gure arbasoen tresnak eta makinak funtzionatzen ikusiko ditugu: burdinola, errota, irina egiteko baliabideak, arotzeria hidraulikoa, ogia egiteko labea, etab.


        


Zeanuriko Olabarriko errota

Errota berritua, antzinako errotarien jarduera eta haiek erabiltzen zituzten lanabesak eta materialak erakustea helburu duena. Aldez aurretiko ordua eskatzea gomendatzen da.



              


Errotazar Zentral Hidroelektrikoa

Errotazar zentral hidroelektrikoa Dimako Indusi auzoan dago. Ehun urte beteak dituen zentral honek jatorrizko instalazioak gordetzen ditu: ur-bilketa sistema, biltegia, hoditeria eta turbinak.

1910ean Flora L. de Heredia andreak Errotazar errekako urak erabiltzeko baimena jaso zuen, garai hartan enpresek eta herrietako argiztapenak elektrizitate eskari handia sortzen baitzuten. Beraz, zentral hidroelektrikoa eraiki zuten, eta horretarako inguruan zegoen errota zahar bateko ur-hoditeria erabili zuten.

Urte batzuk geroago, 1937an, zentrala Hijos de Mendizabal enpresaren esku gelditu zen. Zentralean lortutako energia elektrikoa enpresa horrek Durangon zuen fabrika batean erabiltzen zen.

Normalean zentrala itxita egoten da, baina bisita gidatuak antola daitezke zentralak nola funtzionatzen zuen jakiteko.

Interesdunek 659 803 506 telefonora dei egin dezakete.

 




  • Arratiako Tranbia